本週週記

一個字'懶'囉, 一次記下幾日的日記.

天氣仍然好熱, 最想做嘅係修剪下d頭髮, 
早幾日去到髮型屋, 原來幫我剪髮的師傅跌親,
唔知幾時先返得工, 師傅幫我剪髮剪咗三拾幾年, 都係鍾意佢幫我剪嘅髮型. 我依家個頭都幾'嬲憂' 成個生意失敗咁款, 希望佢快d好番, 幫我剪番個精精神神髮型出發.

喺會展買咗好多急凍肉類, 所以呢個星期, 唔使去街市, 只係買d菜就得.


乾煎鹿兒島黑毛豬, 一d都唔'鞋'.


粟米魚肚羹, 媽媽知我個女喜歡食魚肚, 
所以久唔久就會買一大大包魚肚比我.

噚日上完烹飪堂, 累累地, 煮個洋蔥鮮茄豬扒意粉做晚餐.

星期五晚跟husband同佢朋友去釣船, 
其實我唔鍾意釣魚, 
所以都係睇人釣同埋係度發呆, 
見佢地真係有收穫好開心咁, 
我都有收穫...比蚊釘咗3野.

原來佢地會釣到夜晚12點, 
我當然唔會睇咁耐喇, 呆到9點幾走人lu.

 泊在碼頭邊一艘木船, 睇嚟身經百戰.

又用芽菜機發芽菜, 今晚有得食.

摘好之後特意秤下佢, 太約有半斤, 用咗1.5元綠豆.

噚日去學整香腸, 幾好玩架,
香腸係用呢隻免治豬肉, 不過落堂時已經售罄,
訂咗幾包, 到時有得整喇.

以後可以食自家製香腸囉, 

等我得閒研製下多d味道先得.

介紹埋呢個油樽先, 真係好好用, 一滴油都唔會漏, 

個樽乾乾淨淨, 唔使次次倒完油又要抹下個油樽,

個樽本身無圖案, 膠貼紙係呀女d寶嚟嘅呢.