網頁

2014年6月26日 星期四

美國遊記六月二十五日 ~ 閒逛Quincy

是日天氣晴朗, 不時吹來涼風。
弟弟和弟婦要返工, 姪女們帶我們四處逛和搵食。
説帶我們步行約15分鐘的店子吃早餐, 愈行愈不對路, 不是15分鐘而是30分鐘喎。

我㸃的早餐法式多士配香腸薯角, 一上枱嚇一跳, 好大份呀。
香港吃的法式多士都是配糖漿甜吃的,這裡鹹食的, 特別得嚟好味道

加一杯滿滿的朱古力,好飽好滿足。


好舒服的小店, 顧客都是上了年紀的老街坊,看見他/她們的樣子令我想起"天繭"這套戲, 故事大概說一些天外生物的蛋掉進一家人的泳池,人類浸了池水會變得愈來愈生後生。 




姪女讀書的學校。

早上吃得太豐富, 中午只吃了一份沙律雞墨西哥包再加杯任飲可樂。
跟著去我至愛的超市,好多野都想買買買。
晩上弟弟帶我們吃中菜, 價錢經濟又美味,一個"薑蔥雙龍"(雙龍即是兩隻龍蝦)都不用30美元,肉質新鮮,蝦鉗的肉質是一梳梳的,不像香港實得得又粉粉的。
影了晚飯的相,最後發覺原來沒有放入記憶咭,白影一場。
用ipad寫blog很不方便,唔能夠得心應手,要想個理想形式先得。

Continue Reading...

2014年6月25日 星期三

美國遊記六月二十四日 ~ 出發喇

連轉機機程時間差不多坐了一整日飛機,幸好check in時獲通知upgrade了去premium economy , 座位闊落咗,椅子有升起腳踏,舒服得多了。
看了四套戲,食咗兩餐,瞓了幾個失魂覺就到了芝加哥,再轉機坐多兩個半小時到了波士頓。
弟弟和兩個姪女已經在機場等我和husband。
波士頓機場取回行李處是公眾地方的,唔怕比人取走?
全喼都是零食,姪女們最開心喇。
過海關很順利,關員問有沒有食物, 我答有呀, 再問有沒有fresh food, 我話沒有,就行得喇。
我幾個喼都有食物,要查就有排先出到閘囉。

 回到弟弟家已是晚上八點幾,但天色仍然未黑齊。

波士頓和香港時差12小時,所以不用較手錶時間。
心情仍然興奮,第二朝六點幾已睡醒,這裡早上天氣仍然清涼,空氣很清新。
我都未試過朝早六點寫blog咁勤力。
出發前已病了一趟,飲了十多碗中藥, 算入咗數, 之後日子都精精神神架喇。
好期待紐約,拉斯維加斯,加州,和迪士尼。。

Continue Reading...

2014年6月10日 星期二

是日晚餐 ~ 香煎帶子伴蒜茸蛋黃醬

前兩天跟一位法式私房菜大師學習烹調法國菜,
我們是他教的第一班學生,
堂上充滿歡笑聲.
大師很細心教導,
有問必答而且講解詳細,  
學識唔少烹調技巧.
最喜歡上示範堂,
因為上完堂後,
拿著食譜買食材回家煮是一種樂趣.
而實習課就因為上堂時煮過,
所以上完堂後短期內都唔會再煮架.

煎帶子的材料不用買, 屋企有齊.....
成了今晚晚餐.

第二樣要練習的是紅酒洋蔥,
要把整支紅酒煮至乾身, 時間真不少呢!
不過洋蔥絲似乎切得粗了些, 有待改善.

 唔少得的青菜沙律.

這個蒜茸蛋黃醬, 連百彈的囡囡都讚好味.


以下是上堂的照片.
 大師示範菜色後有得試食.....好味道.

香煎帶子伴蒜頭蛋黃醬及紅菜頭茸

好大盆青豆呀,
呢個湯未必會煮,
因為囡囡唔鍾意食豆類食物.

青豆鵝肝火腿湯.

好厚脂肪的鴨胸,
要有朋友聚會先會煮囉.

煎法國鴨胸伴黑莓汁
Continue Reading...

2014年6月6日 星期五

松露醬溏心蛋

前幾日行太古城超市,
見到有孖裝松露醬$139兩樽,
真唔敢相信, 因為平時一樽都要百多元.
唔知係咪好耐無行超市, 見到樣樣都想買,
咁就比佢拖走咗我一隻金牛,
哈哈! 全部都是食物來的.

松露醬包裝內有一張小咭,
兩面都有一個食譜,
一個係黑松露溏心蛋,
另一個係牛肝菌醬伴意大利粉,
兩個煮法都好簡單,
今日試咗黑松露溏心蛋, 好美味呀.
其實我都有去上堂學整溏心蛋,
蛋的數目和時間要處理得好,
覺得好難, 所以一直都未有煮過,
第一次整就成功好開心呢.
husband食過之後話...以後點出去食嘢!

意大利樂其雅食譜:
雞蛋4隻
鹽2茶匙
黑松露菌醬適量
1.將生雞蛋從冰箱取出後先泡在水裡至少一小時直到恢復室溫.
2.開水於鍋中煮沸後轉小火, 倒入鹽, 接著放雞蛋.
3.把雞蛋煮2分鐘, 熄火焗4分鐘.
4.將雞蛋浸泡在冷水裡冷卻, 避免餘溫使蛋黃熟透.
5.輕輕撥開蛋殼後, 將雞蛋對半切開備用.
6.最後, 在溏心蛋上放上適量黑松露醬即可.

我的經驗是要用個大又高身的煲, 水要起碼一半以上.

一樽黑松露醬, 一樽牛肝菌醬, 各90克一樽,賣$139真係好抵呢.
和朋友講, 朋友都有去買, 朋友話係做緊推廣, 在太只做一星期推廣, 早知我買多一pack喇.

Continue Reading...

2014年6月4日 星期三

團友聚會

很久沒有和團友在我家開大餐 lu,
因為團友怕我攰, 所以近年的聚會都係去團友屋企, 真係唔好意思呢.
團友好就我架, 我只係整咗少少嘢食,
其他食物都係團友買嚟, 多謝晒你地呀!
今次聚會目的係講下今年秋季去九州行程,
食得好開心呢!

 



今次多了兩位新團友,
特別在花虛買咗靚花點綴下.
 
團友拿手美味沙律,
我就整咗個新鮮士多啤梨沙律汁.

今次食咗三種蠔, 一共六打,
要多謝幾位開蠔猛男呢!
 

真係冰脆鮮味.
 
 特大牡丹蝦, 比起在日本吃的更鮮味.

蝦頭用焗爐烤的功能烤熟, 好野味.
我怕膽固醇當然無食囉.
 
一個羊架原味焗,
一個羊架用保雲酥焗,
團友話要七成熟, 真係考起了,
好彩今次無令團友失望.
 
 鹵水雞翼.

失水準的西班牙海鮮飯,
煮八人份量飯真不易呀.
 


 

還有兩款飯後甜品,
真滿足, 感恩!
其實九州之旅是下一個旅程,
今個月尾會去美國探弟弟一家,
弟弟已經編好行程帶我們去拉斯絰加斯和加州,
另外會抽一兩日去紐約探親戚,
好緊張呀, 早一排已經開始跑下步,
希望整個旅程精精神神.
 
 
Continue Reading...

2014年6月2日 星期一

今日食咗糉未呢~

又到端午節,
今日天氣好好, 沒有下雨又有些微風,
在家沒開冷氣都可以.

每逢端午節奶奶都包糉比我地,
一食就食咗三十多年,
奶奶包的糉真材實料,
每隻糉都有成粒乾瑤柱, 腩肉, 冬菇, 鹹蛋黃,
囡囡鬼咁有心, 食完打電話比嫲嫲講多謝,
又唔見佢對我地咁細心喎....


祝大家端午節快樂!



Continue Reading...