日本製造

有日經過一檔收賣舊電器檔仔,
聽到有個婆婆問, 舊hifi收唔收,
收賣伯伯話要睇過先,
婆婆話: '真係日本做架'.
[日本製造]在好多人心目中已經認定係好嘢嚟.

這花樽原身喺一支日本清酒,
帶去朋友家吃晚飯,
酒飲完, 覺得個樽線條好美,
雖然有點唔好意思, 都係帶返屋企.
用嚟插花好靚呀~

睇中醫時我問醫師：金鷄鐵樹酒好唔好？
醫師：聽過個名，但唔知係點，因為個名好得意所以記得有咁嘅酒，等我得閒去了解一下。
我：咁養命酒好唔好？
醫師：我睇過成份都可以架，幾好架，起碼[日本製造]吖嘛。
聽到心笑了！

去年到日本九州櫻島旅行時買的火山灰岩花盆,
話說種花不用施肥, 因本身有好多養分.

花開得好燦爛.

 終於買番個玻璃膽熱水壺用，仲係[日本製造], 三佰蚊唔使.

煲前年去日本時朋友送的,原身的蓋跌爛咗，換了一個微波爐用的玻璃蓋，又突然爆了，今次比個不銹鋼佢，一定唔會爛喇！
呢個煲使用率都好高架,
煲湯, 煲飯, 炒餸菜, 蒸肉, 煎蛋都用佢, 貪佢易洗.

近排執屋, 在箱底搵到呀女小學的玩具,
佢唔玩架喇, 但係都唔可以'dum'喎.
[龍珠]係佢細時最鍾意睇嘅日本卡通片.
連漫畫書都儲有唔少, 當年係見佢乖咪買一本比佢.

講下少少題外近況先~

有日買完餸, 突然好想食d鹹嘅零食,
經過seven,買咗呢兜好耐無食過嘅東西回家吃, 仲有一杯即磨咖啡. 跟住whatsapp張相比呀女,
呀女覆我: "呢個野係我食到最求期, 又唔想用錢食飯時候先食既太空食品... 佢直頭係一堆化學物品...."
真係好難食, 完全無味道, 個胃好想排斥佢, 咖啡喝一口都倒了.

紐西蘭寄來的信, 竟然有咁靚郵票.

係朋友都知我出親門都病,
有次同朋友傾計, 講住過邊間酒店有污糟嘢,
我話: '我病果次果間呢',
朋友們不約而同齊聲話: '你有邊次旅行唔病架'.
我聽到都覺好笑.
近排積極食中藥, 希望調養一下身體,
旅行精精神神.

依家煲藥好叻架喇, 唔使點睇火,
食埋呢碗已經食咗24日藥,
可以暫停抖下, 煲藥真係好困身.