新年糕點

還有一個星期就係大年初一啦,
不過好似仲未感覺到新年氣氛,
前日去咗廸廸尼買咗d賀年手信, 間屋多咗少少紅色咁啦.

屋企大掃除....除咗個幾星期, 啱啱今朝搞掂晒囉,
只有廳大玻璃窗未抹,呢d留番比屋主做lu,
今晚貼埋揮春, 安樂晒~
聽日就可以去買材料蒸糕.......

上兩個星期和餅友們一起去學整新年糕點,
有蘿蔔糕, 馬蹄糕, 紅棗糕和年糕,
在堂上試食時, 個個同學都大讚,
上完堂每人都有一個糕點帶回家,
husband都大讚, 質地柔軟, 甜嘅唔太甜, 鹹嘅味道適中.
連呀女平時唔吼我嘅甜品, 都話要食多d馬蹄糕.

本來年糕不在課程之列,
係師傅比我地食過年糕之後, 同學們請求師傅將下一堂原本要教的芋頭糕改為年糕,
因為師傅做的年糕柔柔韌韌唔黏牙, 凍食都一樣咁正.





椰汁年糕成品

有五層的紅棗糕, 要好好心機分5層蒸.





我至愛的蘿蔔糕,
家姑每年都會蒸好大盆蘿蔔糕比我地,
可以由初一食到人日, 日日唔使煮飯.

好幼滑的馬蹄糕,
師傅話馬蹄切片得架啦, 不用拍碎, 拍碎會流走馬蹄水份,
已經買咗馬蹄粉, 聽日去街市買馬蹄可以整啦..

睇到好想食呀~

補腎祛濕煀雞~
除咗學整新年糕點, 又去過煤氣公司學養生食療,
呢堂係講關於關節炎,
對手肘痛咗幾個月, 希望睇下有咩食療有幫助...
除咗呢款, 仲有一款湯水, 係驅寒祛瘀止痛雞湯,
見到湯嘅藥材料有一樣係"地龍", 梗係要問問係咩嚟先,
醫師反問我食唔食"和味龍",
我話田雞我都唔食架,
原來"地龍"係蚯蚓,
嚇得我吖, 湯都唔敢飲.....





近幾個月又去咗學書法,
好似自從小學拎個毛筆之外, 都未曾寫個大字,
朋友都驚我三分鐘熱度, 紙筆墨都借比我用,
寫寫下又好似有d興趣,
咁大個人都好少限時限刻去做d咩野,
所以最頭痛就係定時個個星期要交功課,
我寫一篇字要寫成個鐘頭, 真係一筆一筆嘔出嚟,
間唔中寫到一個滿意嘅字都好開心架,
唔覺唔覺又學咗幾個月.

寫寫埋埋都有好多篇字,
不過總係成篇字, 得一個字靚囉,
有時成篇字都唔似樣,
剪晒d滿意嘅, 同個盒裝要佢, 易收藏~