十一年前嘅今日, 瞓喺瑪嘉烈病床上, 朝早7點幾, 有個姑娘拎左一大堆做手術前要預備嘅物品, 都無乜特別吖, 反正我之前都入過5次手術室架啦, 無耐…有個姑娘同我講, 一陣同你插胃喉……..吓, 心諗以前做手術唔駛咁架喎. 心開始有d驚, 係咪會嘔餐C架, 諗諗吓好想將嗰d野搬晒過隔離床. 無耐姑娘又嚟, 我同佢講我好驚, 姑娘拍左幾吓我肩膊, 話: 唔駛驚架, 好似食意大利粉咁之嘛, 不過唔係用口食, 用鼻食, 你猛咁吞就得架啦. 我深呼吸之後點頭, 大概幾秒鐘時間已經整好啦,個喉嚨感覺好唔舒服.
9點鐘入手術室, 見到醫生地都係穿著膠拖鞋, 好casual, 一d都唔似[妙手仁心]咁呢, 大概4點幾, 手術做完啦, 成個人凍到冰咁, 朦朦朧朧好似蓋住一張銀色嘅被, 放左我入一個圓筒形嘅儀器入面, 嗰度好暖.
返到病房, 麻醉藥開始過, 傷口有感覺….好痛呀, 我郁都唔敢郁, 因為輕微郁動都會好痛, 姑娘話比我知我床頂有個盒, 如果覺得痛就按一吓個制. 按左…都仲係痛嘅, 再按…都係, 如是者按左幾次, 心諗個盒係咪壞左, 又按左好多次, 姑娘巡房……嘩! 乜你好痛咩? 從此次後我覺得止痛針止痛藥都係唔work嘅.
第二日醫生巡房, 醫生話有一個好消息一個壞消息, 我都未比反應, 醫生講晒lu, 佢話壞消息係個腫瘤係惡性嘅, 好消息係個腫瘤比個腎包住晒, 而個腎又比d脂肪包住, 所以整個腎連脂肪都切除咗啦, 手術好成功.
住咗四日, 醫生話我進展好好, 可以出院, 但係當時husband上緊course放唔到假, 呀囡又就考會考, 返屋企真係無人照顧, 要求醫生比我住多3日, 醫生都應承, 佢都提醒我話醫院始終病菌多. 佢講得真係啱架, 隔離床個呀婆咳, 連我都咳埋一份, 每次咳時傷口勁痛, 唉! 咳到喊…
當年10月唔舒去睇私家醫生, 醫生即刻寫紙比我去急症室, 照完X-光 都未知出了什麼事, 急症室醫生比我排期睇專科, 排期時間要3個月, husband义住條腰好嚴肅咁同醫生講, 話要等咁耐, 可唔可以一路做住驗查等排期,好彩醫生都應承.
到做腎造影同照X-光時, 我聽到d職員講, ‘好似有d料喎’, 跟住又要我照多次, 我自言自語咁同佢地講要照多次唔慌好野, 佢地安慰我話可能有d野睇錯啫, 照清楚好D.
跟住收到醫院寄嚟嘅信要我提早見醫生, 都知無好野, 不過都未諗到咁大件事.
見醫生時, 醫生話有腎有4厘幾cm嘅黑影, 可能係水泡可能係腎石亦可能係腫瘤, 要做電腦掃瞄, 醫生仲親自打電話幫我book時間, 不過最快都趕唔切幾日後嘅覆診期之前, 醫生建議可以寫紙比我去私家醫院照, 可以即刻有報告. 見完醫生一個人行出瑪嘉烈,都唔知行去邊, 眼淚係咁湧出嚟, 路過停車場, 路過瑪嘉烈嘅大鈄路, 對腳無目的地係咁行落山, 終於諗起要打電話返公司, 同事即刻嚟陪我, 喺美孚大家樂坐, 再打電話比husband.
第二日拎住張醫生紙去浸會, 照完之後, 我第一句就問醫生係咪實物, 佢拍咗我膊頭幾吓點頭話係呀, 雖然眼淚又開始湧出嚟, 不過又未至於喊晒咁, 我問佢點解腎都會有嘅, 佢話人體好多地方都有幾會架, 有人喺眼都有呀.
本來打算等多兩日覆診時先比個報告醫生, 不過嗰日下午個心好跳又暈又想嘔, 於事拎住個報告去急診室, 個醫生睇咗d掃瞄片, 跟住同我講 ‘呢個已經係事實嚟架啦, 你要接受啦’ 我心諗..我又無對你喊苦喊忽, 又無話接受唔到, 又無問你點解會係我, 做乜話我啫, 我只係想知道點樣醫啫, 最終比佢擲咗上病房, 上到病房有理無理要打支黃豆仔, 黃豆仔其實係一支類似針筒, 插喺手背唔知咩脈嘅位, 係方便日後輸送藥物, 我最憎最怕, 因為通常插到出院, 插得耐手背又痕又腫.
等到第二朝醫生巡房, 睇哂我d報告; 到下午醫生話個腫瘤佔咗半個腎, 醫院會當個腫瘤係惡性處理, 會整個腎切除, 唔會做測試, 因為插支針入去抽組織出嚟, 如果係惡性嘅話, 當抽返支針出嚟就可能會擴散到其他位置, 所以如果切除咗個腎之後如果驗到係良性唔好怪醫生切咗我個腎. 又點會呢! 慶幸自己遇到幾位好醫生, 好悉心地處理我嘅病況, 我先可以復原得咁快.
等到拆線啦, 姑娘問我想唔想睇吓自己個傷口, 我心諗唔好掛, 姑娘話你望吓啦, 一望之吓, 今次唔係線嘅, 係有廿幾個釘書釘嘅物體, 心諗C啦, 獨個拔出嚟咪要痛好耐, 不過係原完唔痛架, 又可能我驚得滯唔知痛呢!
你要小心身體呀!!!!!!
回覆刪除這篇文章係醫院打呀!!!!!
HA HA
[版主回覆12/07/2011 16:34:00]thx 呀! 唔係醫院打啦, 11年囉, 今朝喺屋企打, 不過有好多細節我特別有印象.
身體健康!!
回覆刪除[版主回覆12/07/2011 23:23:42]thx ar !
難忘的往事,唔好想太多,
回覆刪除珍惜現在的人和事,好好享受每一天,
祝你每天都開心快樂,歲歲平安!
[版主回覆12/07/2011 23:26:31]唔啦, 依家都無咩感覺啦, 因為今日又係另一個紀念的日子所以每年都記得呢日囉. 謝謝你呀.
最困難的時候已經過去。
回覆刪除以後都健康快樂。
[版主回覆12/07/2011 23:31:40]係呀, 病唔緊要, 最緊要快d好番.
11年了,祝你快快樂樂,開開心心,健健康康地再過無限的11年。
回覆刪除[版主回覆12/07/2011 23:34:49]係呀, 11年lu, 唔知有日瑪嘉烈唔使我再去覆診, 會唔會有失落感呢!!? 大家都要快快樂樂,開開心心,健健康康地過每一日啊!
祝身體健康
回覆刪除[版主回覆12/08/2011 20:38:49]謝謝你呀~
好理解當年你的心情.., 總之大步檻過, 小心身體, 明天會更好的!!!
回覆刪除[版主回覆12/08/2011 20:39:15]謝謝你呀~
好了解妳的心情.........我都經歷過家人的大病, 幸好都大步檻過, 但當日那種像噩夢中的恐懼心情, 我估和病人都有得比, 今天都淡下去了, 雖然仍然記得, 但反而令我更感恩............十一年, 冇事了, 玩多d, 吃多d!!
回覆刪除[版主回覆12/09/2011 16:38:38]家人有大病真係好難過, 試過有段時間好怕屋企電話響, 老人家精神番自己最開心. 仲有一個, 兩個或者三個黃金十年要開開心心去過.
祝身體健康 !
回覆刪除[版主回覆12/12/2011 17:10:10]謝謝妳!
沒事啦~~十一年過去了, 是人生一段經歷.
回覆刪除現在是享受美好人生, 健康的煮多D美食. 到處旅遊看風土人情, 多寫意~~
[版主回覆12/14/2011 23:33:22]係呀, 希望可以到其他地方見識多D.
祝福你永遠健康快樂!
回覆刪除[版主回覆12/22/2011 14:16:23]謝謝妳! 乜祝妳聖誕快樂!新年進步!