肉醬意粉

記得第一次自己煮西菜就係千層麵,
N年前囉, 喺餐廳食過之後,
自己就試吓去煮, 都係估吓估吓咁試整,
整過覺得味道都唔錯,
以後整類似嘅都係隨自己意去煮呢,
整肉醬都係咁上下啦,
材料都係蕃茄, 洋蔥, 茄膏,
想味道多d, 又可以用紅黃甜椒, 鮮/乾菌類, 甘筍...
加埋白酒去煮都得, 總之啱自己味道就得囉.
喺餐廳食千層麵同肉醬意粉硬係覺得佢過鹹和過酸,
又唔難整, 我多數自己煮囉..
不過煮千層麵真係要好好心機,
因為一次只可以烚兩三片麵,
烚完又要用保鮮紙隔開包好,
所以比較少煮千層麵, 除非有朋友到啦!

一人份晚餐....
自己加多隻荷包蛋...又幾粒芝士.

M & S 呢隻蕃茄醬幾好用, 好香蕃茄味,
可以唔使買茄膏lu, d茄膏由幾蚊一罐買到家吓拾幾蚊罐, 差唔多貴咗一倍...

材料:
枚頭廋肉 大約10蚊
煙肉 數條 (連同豬肉一起'啄'碎)
蕃茄3個去皮切碎
洋蔥一個切碎
蒜茸一粒
香草適量
糖 兩湯匙 (如果唔怕酸可以少糖)
鹽, 黑椒碎

先將煙肉肉碎爆炒至乾身盛起,
爆香蒜茸, 下洋蔥炒至軟身,
加入香草, 蕃茄煮片刻,
加入蕃茄醬3湯匙, (如果覺得唔夠水份, 可以加2-3湯匙水)
加入已炒煙肉肉碎,
慢火煮至汁杰,
下鹽和黑椒碎調味.

先煮好個醬,
再用鹽水烚意粉, 按照意粉包裝上需要嘅時間去烚,
將烚好嘅意粉除即放入煮好嘅醬內拌勻, 煮約一分鐘就得啦.