Rity Yc's Blog: 是日晚餐

顯示具有 是日晚餐 標籤的文章。顯示所有文章

2014年12月5日星期五

簡單早午餐

天寒地凍特別好瞓，

睡晏了，來個早午餐。

材料都是昨日在city super 買，

昨日的citysuper好似打到嚟，

想要手推購物車都要排隊等，

排隊比錢時，條隊長到看不見收銀處，

原來會員咭有八折或九折，

買了約300元平了46多元，又好抵呀！

食完後才發覺忘記煮蘑菇，
唔怪得食時硬是欠了什麼。

是日晚餐

天氣轉冷，煮番餐暖身餸菜～
紅棗杞子魚肚蒸雞
清炒椰菜
黑蒜螺頭鮑片海參煲雞
將隻雞起左骨嚟煲湯,
雞胸雞脾和翼用嚟蒸,
哈哈！十分慳家。

2014年9月8日星期一

本週伙食

今日中秋佳節,
祝大家中秋節快樂!

依家d奸商真無良, "地溝油"都夠膽整比人食,
連美心都中招誤用"地溝油"整菠蘿包, 好在我唔鍾意食菠蘿包.
但係都唔知有幾多食肆和包裝食物都用咗呢d垃圾油,
真係避無可避, 睇新聞影出嚟嘅"地溝油"真係好噁心.

自己整可以話食得安心囉~

鹽焗雞, 用220 度焗35分鐘, 中途反轉雞身一次,
香噴噴呀!

自家發的芽菜炒自製豬肉腸, 加超市露筍.

之前介紹過的葡式海鮮飯.

無意中發現原來有一支2011年在加拿大買的冰酒未飲,
幸好未有變壞, 仍然好香提子味, 配海鮮飯食得開心.

繼黑毛豬肉腸之後, 又整咗雞肉腸,
買咗好多腸衣, 有排整lu.

用咗優質雞肉.

自己整自然唔會落肥肉, 所以香腸亦不及街外的油滑,
下次試下用低溫慢慢煎熟, 希望口感會更好.
香腸的小洞是芝士溶掉了, 如果煎到香腸已熟又留得住芝士就perfect 喇.

雞用腸用了這食譜, 我另外再加入義大利蕃茜和義大利羊奶硬芝士.

咖哩豬扒飯, 最愛碟頭飯, 慳水慳力.

近期都有焗下麵包,
黑芝麻醬包, 第一日都有芝麻香味, 第二日芝麻味少了.

加牛油好正呀~

用紅茶葉泡出嚟的茶做麵包有淡淡茶香.
下次又試下其他茶葉.
份量都係用麵包機的食譜,
2杯麵粉, 2/3杯水(泡茶的水), 1湯匙半糖, 1湯匙半奶粉, 1湯匙牛油,半茶匙鹽, 1茶匙酵母 (識背囉).

上星期六約了朋友去上水的榮昌茶座食午餐,

好山長水遠囉, 這間茶餐廳電視節目都有介紹過,

仲讚不絕口, 其實都係一般般啫,

我點的紅燒豆腐飯要40元, 都幾貴呢,

不過順便郊遊一下都唔錯.

husband 點的咖哩雞飯也是普普通通..

2014年8月23日星期六

慳水慳力晚餐 ~ 瑤柱蒸水蛋, 日本菇煮豆腐, 牛肝菌飯

呢日好歎, 不用半小時開得飯,
無湯飲, 沖一壺烏龍茶.

肉絲, 豆腐, 日本菇煮埋一碟.

蒸水蛋蒸得少少實咗, 可能加少了水, 蒸水蛋好難搞呢~

牛肝菌浸軟連水(隔去砂)和飯一起煲, 飯煲好後加少許橄欖油和豉油, 很美味的.

在美國買的泰國有機茉莉香米, 果然好食, 去超市睇下香港有無得買先.

在美食展買的北海道富良野蜜瓜, 好甜呀.

收到屋企電話的電話公司來電, 佢開始就一輪機關槍式講了一大片, 我只係聽到有西餅禮劵, 超市現金劵和一部samsung咩咩送, 真係唔明佢想點, 無啦啦送咁多嘢, 驚架!
我話唔係好明內容係乜, 佢又講多一次, 話多謝咁多年嚟對佢公司支持, 所以送番d優惠....有咩咩...咩咩... 我心諗無理由咁好嘅, 再問佢送咁多嘢有咩要做, 佢話無架, 唔使取消現有合約, 繼續番個合約24個月, 照交番$198月費就得啦, 禮品會有專人送上門, 不同以前要到辦事處取.
電話費係自動轉帳, 講真我都唔清楚我電話月費幾錢多和合約幾時到期.
雖然電話係用我名登記, 唔理喇~ 我最叻係有咩e郁比咗個電話husband聽.
husband用speaker用佢傾, 所以聽到佢一輪機關槍咁又重複多一次. 同時我打電話比在電訊公司工作的朋友, 原來佢送部samsung機係可以上網嘅, 朋友話部機好細部, 無咩用.
husband詳細詢問之下, 原來現時月費係約$110元,即係要多比八拾多元, 從新合約24個月, 部機又無用, 因為屋企已經有一部電腦, 兩部手提電腦, 兩部平板電腦, 3部手機都可以上網, 同佢講無用但佢仍然唔肯收線, 不停咁機關槍式咁講...講...講, 唯有佢未講完都要同佢講bye bye.
佢都好似好慘咁, 講咗咁耐做唔到生意, 但係真係無用呢, 唔可以心軟.
在家靠朋友, 我好多時都要打比朋友幫我解決疑難, 真係唔該晒你地啊!

2014年8月21日星期四

是日晚餐 ~ 香煎馬友魚柳牛肝菌意大利粉

美食展買回來的馬友魚柳真的多用途,

煎又得蒸又得, 魚質唔散, 而且無骨.

今次用香草醃好煎至香脆,

炒軟洋蔥和日本菇拌入烚好的意大利粉最後拌入牛肝菌醬,

唔使半小時有得食.

今日husband約了朋友外出吃食飯,

呀女又無話回家吃飯, 所以煮咗一人份量.

點知呀女失驚無神七點幾返咗嚟,

即刻煮多少少意粉,

哎呀!煮好咗佢話食咗喎.

跟住見佢執行李, 覺得好奇怪,

明天才出發, 咁早執行李不是佢性格呢.

我就睇電視無理佢.

呀女 : "好眼瞓, 好在午飯時在寫字樓瞓咗一陣."

我 : "你聽日唔好瞓呀, 如果唔係夜機瞓唔到架."

呀女 : "吓! 呀媽你唔好嚇我呀, 我今晚上機喎."

我 : "今晚.....好在係你去旅行, 係我就C嘞, 仲係度睇電視"

即刻攞番一早預備好的日元和護照比佢.

呀女問我仲係咪送佢去機場, 因為一早話咗同佢去機場,

突然間咁急, 未有心理準備去到咁遠, 唯有送佢搭的士算了,

不過應承接佢機, 今次一定唔好記錯喇, 因為佢無帶門匙.

2014年8月17日星期日

騎呢晚餐 ~ 芥末醬焗豬肋骨, 牛肝菌醬蒸馬友, 潮州粥.

好古怪的配搭,
沒法子喇,
昨日去了會展美食節血拼,
今日仍未回復原氣,
打開雪櫃求其拎上手就煮,
無胃口食飯, 煲粥食.

芥末醬焗豬肋骨,
用芥末醬加香草醃好, 220度焗40分鐘就食得.
伴上自家製蒜茸很美味,
呀女話蒜茸好正係極品喎,
佢好少讚架, 但我又唔覺有咩特別.

牛肝菌醬蒸馬友
在會展買的急凍馬友魚柳,
都有少少魚.....的鯹味囉, 都可以接受,
肉質唔錯, 我諗煎會比較好食.

一煲加了鹹蛋和皮蛋的白粥.

昨日和好友一共三人, 在灣仔飲完早茶就去美食展,
已經排到上二樓行人天橋,
不過十時開始入場之後, 好快就入到場內.

我們三人的戰利品, 由下數上5袋是我的呢,
行的時間唔多, 大約一個小時已經完成任務, 滿載而歸.
因為其中好友早一日入場視察環境,
所以有策略地知道要買什麼.
不過買完之後就要搵救兵了, 在會展門外等車接應.

有花竹蝦, 魚柳, 鹿兒島西冷豬扒,
牛柳粒, 油甘魚鮫, 北海道帶子.

送禮自用都啱用的鮑魚.

$115元一個北海道富良野赤肉蜜瓜, 北海道先有嘅白粟米.

北海道白粟米可以生吃, 清甜多汁.
美食展明天完結喇, 好唔好去多次呢~
因為有好多地方未行啊!

2014年8月15日星期五

是日晚餐～乾煎豬扒豬肉腸

昨日去了太古食壽司午餐，

跟住再行Apita百貨, 很久沒有去太古城了，

原本有四層的Apita，現在只剩下兩層，

二樓轉了瑪莎百貨，三樓做回商場，

不過無緊要，這兩層好少行，最主要都係行超市，
次次都大有收穫，仲買埋今晚餐餸，

真是無事出街少破財。

沙律菜我始終都係喜歡citysuper, 比較新鮮又多選擇.

這兩塊說是匈牙利黑豬, 肉質唔韌,但係無乜味道,
匈牙利豬肉腸就幾好味道, 唔係太鹹.
煎兩煎又一餐.

2014年5月19日星期一

攰攰地

下午諗住休息一會後去買餸，

㸃知瞓醒已經八點幾，

好在糧倉總會有存貨

一邊烚通粉，

一邊煮意粉醬料，

唔使30分鐘有得食。

材料有香腸，罐頭吞拿魚，香草意粉醬和長通粉，仲有少少粟米。

咁又一餐！

2014年5月3日星期六

碟頭飯

呢餐飯是早幾日的,因為電腦壞左要用ipad,唔多習慣,唔覺意點到板面就唔知去左邊,又要重新整過。

D電器壞得嚟都會傳染嘅,相機壞完到電腦,連部洗衣機洗完出嚟嘅衫都扭得出水,要轉乾多一次,希望佢挨多一年半載喇。

蕃茄肉醬飯,超簡單又一餐。

煮左一鍋肉醬,一餐配飯,一餐配意粉,一餐煮湯通粉做早餐,咁就食左3餐。

2012年9月10日星期一

是日晚餐 ~ 主菜:香茅豬扒配松茸飯, 甜品: 彩繪卷蛋糕

上個星期好少喺屋企煮飯,
因為媽媽生日啦, 同朋友約會啦, 又飲宴啦....
我好麻煩, 食得街外野多, 豐富得滯,
個人發漲晒咁, 面又圓卜碌, 變咗包包面,
可能我唔受到太鹹同埋d味精啦,
今個星期要食番清清地先得囉.....

繼續閱讀

2012年8月2日星期四

是日晚餐 ~ 炸手指魚沙律

好熱呀~
近排日日焗桑拿,
成日想借d意又唔煮飯呢.....
問過husband今晚唔食飯得唔得,
husband話無所謂喎...

繼續閱讀

2012年7月12日星期四

是日晚餐 ~ 沙律, 意粉, 銀雪魚, 紅豆抹茶雪芳蛋糕.

呢幾日真係熱,
日日都有32度以上,
無乜心機煮飯,
都好似有5....6日無煲飯tim~

其實最令我無心機嘅係,
近呢兩個月個胃唔多舒服,
有時突然間好似火燒心咁,
痛到標冷汗,
醫生話可能係胃酸倒流喎~

睇醫生時, 醫生問咗我一個好有趣嘅問題,
佢問我係咪仲係得一個腎,
好鬼愕然...
夠用算啦, 無啦啦點會又整多撻"啦"

醫生寫紙比我去瑪嘉烈照胃鏡,
我第一時間問佢係咪會嘔餐C架,
醫生笑住答我話唔會喎,
係有少少唔舒服咁話喎,
我覺得佢都係呃我多d囉,
我都係自己搵私家照好d...

~~~~~~~~~~~~~~~~~~~~~~~~~~~~~~~~~~~~~~~~~~~~~~~

睇番我餐飯先....