是日晚餐 ~ 焗羊肩伴尼斯蔬菜野米飯

早排喺德福嘅market place 見到有來自英國威爾斯嘅羊肩, 一pack真空包裝的大約有500克重, 買咗一pack 試吓, 味道唔錯, 唔會有太多肥膏, 我焗到剛剛熟, 一d都唔'鞋'唔乾, 肉質都好鬆軟, 好有肉汁, 有時間再去買.

 

 

 

 

羊肩: 除去本身包裝嘅尼龍線, 用廚房用綿繩捆好, 用黑椒碎和鹽調味; 落少許油在煎pan上, 用中火煎至表面金黃, 煎封好表面之羊肩連同迷迭香放入已預熱160度焗爐, 焗35分鐘(視乎喜好的生熟程度加減時間).焗好之後攤抖10至15分鐘先好切呀.

蔬菜 : 用少許油爆香兩粒切碎蒜頭, 加入半個洋蔥粒炒香, 落多少少油後, 再加入一隻茄子粒炒至軟身, 再加入半隻紅椒粒, 半隻黃椒粒炒片刻, 加入一罐蕃茄煮約10分鐘, 再拌入2湯匙白酒醋及兩湯匙糖, 最後加鹽調味.

 

依據包裝上說明, 焗好嘅肉, 肉內嘅溫度60-65C係rare; 65-75C 係medium; 75-80C係well done. 記得第一次焗肉, 想知佢有幾熟, 我用支溫度計去ckeck舊肉有幾熱, 但當我抆返支針出嚟, 睇住d肉汁喺個針孔猛流出嚟, 跟住舊肉好似肉乾咁, 我以後都唔會再咁樣做嘞.呢個經驗幾好.....

Continue Reading...

珍藏

朋友送比我嘅禮物, 件件我都會好好收藏, 閒時拎出嚟欣賞一吓.............樂事!

呢幅畫係中學同學畫比我的, 都有幾個拾年嘞, 依然保存得好好呢, 同學嘅畫功果然勁呀!

 

 

Continue Reading...

團友相聚

我地班團友久唔久都會聚吓, 訂吓d新目標, 依家少咗日本一個好去處, 大家都覺得好可惜呢! 唯有睇番以前去日本的相回味一吓.

 

飯前甜品 ~ 抹茶忌廉雪芳蛋糕.

團友最鍾意食我整的蛋糕, 多謝捧場呀!

 

 

我負責買菜...

 

團友買來的龍躉, 我都係第一次食呀.

 

 

 

d蟹雖然好細隻, 但係都好厚肉呢!

今次係烚吓烚吓, 太好啦, 可以慳番好多功夫.

 

諗起有次去荃灣楊屋道買蟹, 我揀咗4隻蟹, 要成兩斤幾, 雖然點睇都唔似兩斤, 不過諗住街市一定呃秤, 都預咗咯, 算把喇, 但係返到屋企得番3隻, 好激氣呀, 少左一隻唔夠食架嘛, 我諗佢係將d蟹放入膠袋時, 剛剛我又喺銀包攞錢, 無睇住佢,  佢乘機放少一隻囉; 自從去街市買蟹比人呃過之後, 好少喺剩市買海鮮嘞.

 

Continue Reading...

是日晚餐 ~ 日式咖哩牛柳粒野米飯

簡單! 易做! 好味!

 

1. 將120g日本咖哩磚切碎, 放入已滾700ml 清水內, 用慢火煮溶, 間中攪拌一吓.

2.薯仔2-3個, 甘筍半條切粒, 分別炒至金黃, 再一起加水煮至焾.

3.洋蔥1個切塊煎至軟身.

4.牛柳粒500g略煎表面.

5.將煮好的(2), (3) & (4) 加入(1)內煮片刻即成.

Continue Reading...

Green Tea Opera 的背後

一班同學門半年前已經訂下目標要整個抹茶劇院蛋糕, 終於實現咗嘞.

一早預備好了柚子醋柚子蜜焗雞和沙律, 食完brunch開功囉!

用了上好的朱古力粒.

和上好的抹茶粉.

慷慨的牛油...

好一盆抹茶牛油忌廉...一磚牛油混和了抹茶粉, 感覺健康多了.

加了巧手的工夫......

簡單的修飾.

多了魔鬼般的抹茶牛油忌廉, 靈機一動同場加影粟子卷蛋.

欣賞多次........

吸引的成品..........................忘記那些牛油吧.....

加杯green tea latte......滿足...開心...興奮...期待下一次的約會啊.

Continue Reading...

可能只此一次的Green Tea Opera

~ ~ ~ 半年之約 ~ ~ ~

~ ~ ~ 終於實現 ~ ~ ~

~ ~ ~ 四人決戰~ ~ ~

~ ~ ~ green tea opera ~ ~ ~

 

~ ~ ~ 刀鋒無情 ~ ~ ~

~ ~ ~ 我地有情 ~ ~ ~

~ ~ ~ 27 mm ~ ~ ~

~ ~ ~ 決戰成功 ~ ~ ~

~ ~ ~ 殺出一個~ ~ ~

~ ~ ~ 粟甘露煮~ ~ ~

~ ~ ~ 決定再戰 ~ ~ ~

 

~ ~ ~  粟子卷蛋 ~ ~ ~

~ ~ ~ it.....is.....tea.....time ~ ~ ~

Continue Reading...

遊西貢

 

我都從未幫親過呢d海鮮艇, 怕問咗幾多錢, 覺得貴嘅話,  唔買唔好意思.

 

賣魚嘅唔多, 大多數都係賣墨魚, 咁大舊膽固醇, 都有咁多人買

 

 

 

呢兩隻狗睇怕都要減吓肥啦, 狗同人一樣都會有心臟病架.

 

佢睇住路人甲袋菠蘿包, 路人甲話隻狗嘴 "lam lam" (唉, 唔識寫呀)想食喎, 個主人梗係唔比啦.

 

 

呢d船係載人去打高爾夫球.

 

 

喺度又hea咗一個下午.

 

呢日好多人, 海鮮食肆爆晒棚, 日落之後我同husband都係返屋企開餐.

Continue Reading...

梅菜扣肉

我husband同呀女都鍾意食梅菜扣肉, 連肥嘅肉都食埋, 但我就麻麻地, 無qouta 食啦.

前日行街市見到舊豬腩肉好明顯有五層(聽講話五層肉最靚), 買嘅時候隔離個呀嬸都話靚.

點知返到屋企原來我無梅菜扣肉嘅食譜, 唯有用我嘅智慧去煮, 煮好咗第一日唔食住, 留到第二日先食, d扣肉好焾好入味.

至於d梅菜, 我發覺近幾年都好難買到靚嘅梅菜, 硬係覺得d味道怪怪地, 又半透明咁, 無細個嗰時食嘅梅菜咁好味, 超市已經唔見有石澳梅菜賣. 有日經過西灣河街市, 喺路邊嗰間雜貨舖買咗少少, 今次用咗嚟煮, 好好味, 似番以前食嘅,  得閒經過要入定貨先. 

 

1.梅菜洗淨切粒, 加些糖同油醃.

2.豬腩肉(買左20蚊)出水, (下次會煎一煎表面, 等層皮好樣d)

3.將豬肉排在碗肉, 皮向下, 上面舖上梅菜, 薑片同蔥.

4.細半杯熱水, 一粒冰糖,(攪溶) 一湯匙老抽, 半湯匙生抽, 半粒八角, 幾粒花椒, (我諗加d蠔油好味d, 不過屋企無), 加入梅菜豬肉內, 蒸至焾. 蒸吓又熄火焗吓, 大概蒸咗3個鐘.

5.最後倒咗d汁出嚟加些生粉埋芡, 再淋在梅菜扣肉上.

雖然唔知係咪咁煮, 但好好味囉.

Continue Reading...

是日晚餐 ~ 焗羊架

 

早餐剩嘅綠茶提子紅莓包配橄欖油黑醋.

 

我最鍾意食我自己整嘅沙律, 今次係雞蛋, 薯仔, 粟米, 菠蘿, 甘荀沙律.

 

以前好怕整羊架, 唔係未熟就係熟到乾晒, 試咗好多好多次爐火, 而家隨時都可以焗到啱我口味嘅羊架, 保試自己滿意.

 

剛剛熟又保留到肉汁 : ~ 用鹽和黑椒碎調味, 下少許橄欖油在鑊內, 用猛火將羊架煎至表面金黃, 再放入焗爐, 最好放在烤架上焗, (頭拾幾分鐘骨向上, 之後反轉) 150度焗30分鐘, 再110度30鐘, 焗好出爐用鍚紙包住15至20分鐘.

 

呢罐果汁酒好勁, 飲完面紅兼心跳, 都唔知乜鬼野.

 

Continue Reading...