相聚35載情緣

學堂呀sir和同班同學到訪, 算一算大家結緣35年啦, 記起當年拎住一袋手提行李踏入學堂嘅心情難以形容, 一位呀sir和藹可親, 另一位就惡C到不得了, 如今兩位呀sir都成了慈祥的老人家啦! 每次聚會大家都講番當年情, 一時間屋企多咗幾個墟, 你講你嘅, 我講我嘅, 好開心呢~為咗今次聚會, 我傾盡全心全力去做了幾道菜, 希望大家都喜歡啦~

高爾夫球肘

一對手踭痛咗幾個月, 睇公立嘅家庭診所, 醫生話係高爾夫球肘, 可能經常做重複動作引致勞累, 就好似抹窗打掃, 醫生開咗止痛消炎藥和胃藥, 不過d藥好勁呀, 雖然食咗手踭即刻唔痛, 不過就胃痛, 仲周身唔舒服, 食咗兩次都無食啦.  見私家醫生佢話消炎止痛藥要由腎或者肝去分解, 過勁嘅止痛我都唔適宜食, 做吓手部運動都有幫助.
最怕行街入商場, d門鬼咁重, 唔夠力推開, 有時要用個身去推開隻門, 有時又衰衰咁吼人地推開咗自己就跟急急腳住尾. 依家連掃地都要就住, 拎重野一定拎唔好啦, husband話我上網上得多, 成日拎住個mouse攪成咁喎, 要我少d上網睇吓會唔會好d.
我都唔打高爾夫球嘅, 無啦啦有個高爾夫球肘, 真係唔抵呀~
今晚有好多朋友到訪, 我一個人煮15人嘅晚餐, 之後真係要好好休息吓啦..

薑餅人過聖誕~

祝大家冬至 ~ 聖誕 ~ 新年快樂! 身體健康!

是日晚餐 ~ 芝士青口野米煲仔飯

下午喺超市買餸, 行嚟行去都唔知食咩好, 終於懶懶地一煲過算啦 ~

去廸士尼排隊

 

反斗奇兵大本營開咗都一段時間, 最近先得閒去睇吓, 米奇同米尼都轉晒聖誕新裝, 好有聖誕氣氛呢!

開工囉~

好難得又和餅友同學仔相聚啦
記得上次大家相聚一起整抹茶劇院蛋糕已經係半年前囉

 

十一年了~

十一年前嘅今日, 瞓喺瑪嘉烈病床上, 朝早7點幾, 有個姑娘拎左一大堆做手術前要預備嘅物品, 都無乜特別吖, 反正我之前都入過5次手術室架啦, 無耐…有個姑娘同我講, 一陣同你插胃喉……..吓, 心諗以前做手術唔駛咁架喎.  心開始有d驚, 係咪會嘔餐C架, 諗諗吓好想將嗰d野搬晒過隔離床. 無耐姑娘又嚟, 我同佢講我好驚, 姑娘拍左幾吓我肩膊, 話: 唔駛驚架, 好似食意大利粉咁之嘛, 不過唔係用口食, 用鼻食, 你猛咁吞就得架啦. 我深呼吸之後點頭, 大概幾秒鐘時間已經整好啦,個喉嚨感覺好唔舒服.

蕃茄濃湯烏冬 & 蕪花果合桃包

一人份晚餐 ~ 蕃茄濃湯烏冬
呢餐真係話咁易, 烚好烏冬, 餃子, 隔去水份, 放入湯碗, 再放上急凍熟蝦, 煮熱半罐罐裝蕃茄, 加水再煮滾後倒入烏冬內就食得啦~

鴛鴦卷

對整麵包有少少明白佢嘅步驟, 整落都唔係太難, 無以前咁 lei hei ~
雪櫃嘅紅豆茸夠整半份, 另半份用咗有機車厘子乾, 車厘子乾本身就好好味, 但係講味道始終都係紅豆同抹茶味夾d.

2011北海道自駕遊紅葉秋の旅 ~ 在札幌盡情地吃

行程尾聲lu, 幾唔捨得都要, 真係要多謝司機們啦, 我地嘅策劃人啦, 導遊啦, 領隊啦, 仲有財政啦同埋唔知咩咩啦, 我剩係知我無咩貢獻囉...
團友話因為我第二日病咗食唔到長腳蟹, 一於同我去食番次, 同團友一齊好幸福呀.....
呢朝一早去中央卸売場外市場食早飯.....

2011北海道自駕遊紅葉秋の旅 ~ 豐平峽

離開定山溪繼續前往豐平峽,  私家車唔可以直接到達豐平峽, 先要泊車在山腳遠處的停車場,  在停車場有電動巴士前往, 然後再搭覽車上山, 亦可以選擇步行上落山, 我地搭覽車上山, 步行落山, 如果要再上山頂高處, 嗰段路就一定要行啦~

2011北海道自駕遊紅葉秋の旅 ~ 定山溪

已經係行程嘅第六日, 本打算呢日係自由行, 後來決定租多一日車, 再去吓郊區定山溪和豐平峽...
我只係上車落車, 其實我都唔清楚係邊度, 旅行最好架嘞, 唔好咁用腦, 唔好記佢嘅前因後果, 來龍去脈, 只係好好感受一吓當時環境 ~

2011北海道自駕遊紅葉秋の旅 ~ 小樽

上次到小樽係三年前的9月, 天氣熱辣辣的, 今次秋涼涼, 希望下次係落雪呀 ~ 嘻嘻!!!
雖然只係到過北海道兩次, 但係留下嘅印象總覺得曾經到過了多次..

2011北海道自駕遊紅葉秋の旅 ~ 再闖地獄谷

一早起身由酒店房窗望出, 滿山紅葉, 成個醒神晒. 呢日天氣陽光普照, 食早餐時各人都講起地獄谷的美景, 個個都讚成去多一趟呢.... 

2011北海道自駕遊紅葉秋の旅 ~ 登別地獄谷

見到靚景, 大家一落車嘅指定動作就係影~影~影, 雖然天陰陰又大風, 各人都好努力去搵角度拍照.滿山紅葉 ~ 靚..

2011北海道自駕遊紅葉秋の旅 ~ 忍者村

天氣時陰時晴, 太概只有5-8度.
整個忍者村都係靜靜的 ......陰公..遊客人數都唔知有無一百, 佢地唔知要忍到幾時呢~
雖然遊客唔多但係村內各樣節目都照樣安排好, 亦打理得好企理....

Cinnamon Pecan Rolls

噚日教會朋友帶我去學整Brownie, 仲可以喺果度食埋午餐, miss好nice即場整多兩款麵包比我地食仲教埋添, 趁仲記得d步驟快快整番次先, 因為係無食譜, 唔知份量, 唯有用番麵包機嘅份量, 剩係知步驟同記得發酵時間, 唔記得用幾多度去焗幾耐, 是但用咗一般嘅180度, 時間制按25分鐘, 再睇住佢嘅色水, 焗咗22分鐘半ok啦~
 

2011北海道自駕遊紅葉秋の旅 ~ 登別

呢日瞓醒精神好多囉, 繼續行程~
行程計劃乘登山覽車到[有珠山]山頂展望台, 但係去到覽車站, 貼出告示話因為大風覽車要暫停, 要一個小時之後再睇情況再確定係咪重開, 可惜等咗一個鐘都未有結果, 話再等下一個小時再決定, 我地唯有取消上[有珠山].

2011北海道自駕遊紅葉秋の旅 ~ 洞爺

呢整日都天陰陰就好似我心情咁, 唔舒服到只係閉上眼睛 ~

Lunch Buffet @ TST

出尖東一趟先知成座新世界中心拆咗, 最懷念都係咸豐年前常常行東急的日子, 懷念聖薔薇的芝士法包, 先父最鍾意食架 ~

2011北海道自駕遊紅葉秋の旅 ~ 函館朝市

經過整晚獲利回吐之後, 呢日起身成個散晒,

2011北海道自駕遊紅葉秋の旅 ~ 函館山夜景

按行程呢晚會坐吊車上函館山睇夜景, 諗住泊好部車行去車站啦, 哎呀!.......維修中, 無得坐. 有團友堅持要上山頂, 雖然落住毛毛細雨, 但係我地呢個團只要有一個團友話要跟行程就要跟架啦, 最緊要係私家車可以上去山頂囉, 最終都成功上到山頂同泊好部車, 雖然塞咗成45分鐘車, 都值得嘅, 仲慳番千幾yen 一個人嘅車費添.

呢部就係我地嘅戰車嘞, 部車交比我地時都係行咗大約一千km, 一上車仲有陣新車味.

雖然有少少雨粉, 景色好美!
 

遊人都好多呢, 好難先搵到個欄杆影相位~

欣賞完夜景去醫肚囉..

好懷念日本嘅拉麵呀

我嘅鹽味拉麵!

 

喺開放式廚房又學到野啦, 平時我整麵豉湯, 都係煲滾d水, 然後'pet' d 麵豉落去, 原來要爆吓d麵豉先, 之後再加水 ~

去酒店囉~
 

我嘅飛佛....行超市, 呢晚好想飲鮮奶, 咁樣一盒鮮奶就出事喇,  飲完即刻唔舒服, 我估係腸胃炎囉
已經無得瞓仲成晚聽到怪聲, 我張床貼近牆, 牆後係廁所, 道牆就成晚'裂裂嘞', d聲就係我面前咁, 不過我都無氣力去驚, 由佢啦........唔好現形就得啦!

行超市的收獲

2011北海道自駕遊紅葉秋の旅 ~ 加森赤レンガ倉庫

呢日一早去攞我地嘅戰車就向函館進發囉~

往函館途中的休息站

午餐喺「勝つまる」店食壽司
 

喺香港我唔敢食生蝦架, 喺日本都係一件起兩件止, 一餐計播 :)

魚就只係敢食紅肉嘅, 白肉嘅始終都係麻麻, 好似食大魚鯇魚咁~
 

 

 

 

440yen一件連蝦頭, 好鮮味, 燒埋個蝦頭嚟食就好嘞

 

呢位師傅燒帶子的方法幾得意, 佢倒咗帶子被燒時散發出嚟嘅汁, 另外再加上豉油, 我覺得唔比鼓油更好, 更原味~

 

好多bear bear, 太多太靚唔知買邊個好, 一個都無要..

呢日第4餐啦...早餐, 午餐, 小食. 下午茶~~~

我都想食架, 不過怕出事唔敢咁快食住.....唉!呢晚都係出事喇.

好cute好味呀~ 睇到A moon嘅blog, 今次識叫喇~

 

好完美嘅朱古力淋面, 立立令的~

和 husband 嘆吓茶, 悠悠閒閒, 左影右影, 好舒服, 其他團友就各色其式嘞~

 

忍唔住又叫多一件~

好想試~

最後一個南瓜布丁都比團友食埋, 我無得食, 食評係好滑好美味!

食飽飽去碼頭邊游盪一吓

金森倉庫群嘅黃昏好靚, 好浪漫 :)

 

 

好吸引, 都係忍吓口先, 怕食得多生冷野, 肚仔會唔舒服~