小三生日聚一聚

上個週日補祝小三生日, 借個機會 hea 吓聚吓又食吓, 可惜得2個多小時, 可以坐耐d就好啦, 我地坐嘅位置啱啱喺角落, 清清靜靜, 傾計都舒服d.

我就係食左咁多野喇, 掛住傾計, 唔記得食豆腐花同生滾粥, 好唔抵呀....

呢間酒店嘅自助餐食物都係一般, 不過就算美食當前最緊要都係有良朋相伴呢.

再戰斑蘭雪芳蛋糕

今次用180度焗

焗左10分鐘已經升到去頂

唔通又出問題

好緊張呀

好在升到咁上下無再升

 

 

出爐時好靚喎

 

 

不過未脫模都未知結果

 

 

第一次徒手脫模

成功啦

 

 

軟熟得嚟仲有d彈性

 

 

 

 

 

 

行山樂 ~ 石澳龍脊 24-4-2010

出發前先係西灣河水警基地附近的餐廳食午餐,  我地叫左兩個套餐, 有中湯(粉葛, 赤小豆....), 主菜, 白飯, 菜,  甜品, 主菜我地要糖醋排骨,

 

西班牙式煎蛋....原來係薯仔, 意大利銀魚仔煎蛋. 我都係鍾意食港式嘅芙蓉煎蛋多d, 喺大坑東村有間茶餐廳整得好好食架.

 

跟餐甜品, 焗西米布甸,

 

 

都唔知佢咩名堂, 真蛋殼, 內面有奶凍做蛋白, 杧果mousse做蛋黃, 係得意囉.

個套餐嘅配搭梗係覺得怪怪地, 不過都幾多人幫趁架, 喺果區58蚊一個set lunch ok啦.

 

歎完個午餐開始出發囉, 先要行15分鐘到筲箕灣巴士總站搭車, 在某某處落車(唔好問我邊呀, 人地叫落車啦, 我咪落囉), 終點係哥連臣角.

雖然全程只係行左兩個多小時, 不過一開始要上一大段石級, 途中又有d大石頭嘅路, 有段山路無圍欄兼大風, 幾驚吹左我落山呀, 都要用好多體力呢.

 

 

 

 

 

班為食兵團一路行一路已經搵食, 猛打電話睇吓邊度有位食晚飯, 香港經濟真係好左? 打左好多間都無位, 最終訂左新蒲岡嘅得龍飯店. 

薑汁芥蘭: 菜炒得好, 不過多左d油呢

蒜茸灸蒸蝦: 好味.

椒鹽魚鮫: 賣相就靚, 可惜一d魚味都無, 一上枱個個都鬼咁開心, 比佢個外表呃左添.

古噜肉: d排骨雖然封左汁, 但係外層仍然好脆呢.

 

金錢雞 : 食落甘香唔覺肥膩, 最底果塊係全肥豬糕嚟架, 都係食半塊好啦

唔記得咩雞：一般, 唔太滑

話梅豬手: 肉質爽口, 如果再醃耐d更野味.

冬瓜盅: 冬瓜肉都稍熱, 可惜d湯只係和暖嘅

杞子桂花糕: 送嘅, 我無食呀, 因為我一向都唔食中菜飯店嘅生冷甜品.

食完飯仲未完場呀, 又走左去深水埗松記食糖水, 似乎食野多過運動咁.........

滑鐵盧 ~ 斑蘭雪芳蛋糕

本來打算整個斑蘭雪芳係週末行山時歎番個3點3

點知完全失敗

 

好認真咁去買d斑蘭葉返嚟打汁

 

 

打蛋黃.

 

 

打蛋白......一路都無問題吖

 

 

起初都發得斯斯文文

 

 

開始唔對路啦...

 

 

發到好似電左個爆炸頭咁

 

 

個底仲得人驚

咁嘅身世點帶佢去見人吖

失禮嘛

 

朋友話唔介意個形狀架喎...

唯有將個斑蘭雪芳斬件上嘞

下次一定要做好呢個餅

私房泰國菜

朋友極力推薦呢間私房泰菜, 佢地平時都係夫婦二人去, 好想約多d人, 可以試多幾個菜式. 我坐車唔認路, 只係知道喺元朗洪水橋附近, 真係食完都唔知喺邊....

炸蝦餅 ~ 似炸魚餅多d, 比較淋身.

豬頸肉 ~ 其實好肥架, 我每次都係一件起兩件止.

釀雞翼 ~ 雖然只係釀左粉絲, 雲耳, 紅蘿蔔等素菜料, 但係漲卜卜, 食一件都好飽.

唔知咩咩炒海鮮 ~ d海鮮好新鮮, 尤其花甲特別鮮味嫩滑無沙, 個個都要話要叫多一碟剩炒花甲呢.

咖喱炒聖子 ~ 辛辣度對我嚟講啱啱好.

咖喱炒花甲 ~ 最鍾意食呢碟, 正!!!

咖喱蟹 ~ 好厚肉,  汁都清埋.

明爐烏頭 ~ 個汁好辣, 食少少ok嘅.

冬陰公湯 ~ 睇個樣都知佢勁辣, 咪攪我嘞!

豬仔包 ~ 質地好懷舊 feel 呢, 應該係d舊式老麵包舖外賣過來的.

炒椰苗 ~ 我都係第一次食椰苗, 唔錯, 不過我係街市都搵唔到嘅!!

飲少少當慶祝吓...........

椰汁西米糕

芒果芋泥 ~ 好清新, 特別加左幾粒白果, 有心思...

我地一行六人就係食左咁多碟菜嘞.........